നടപ്പാതയിലെ കറുത്ത മരങ്ങൾ -ഭാഗം 1

നടപ്പാതയിലെ കറുത്ത മരങ്ങൾ-- ഭാഗം 1
(ദിൽഷാദ് വി കെ പുല്ലാര)
____________________________________

"മലമടക്കുകൾക്കിടയിൽ നിന്ന് ഗർജനം പതിവായി. ഇടവിട്ടിടവിട്ട സമയങ്ങളിൽ അത് ഭൂമിയെ പ്രകമ്പനം കൊള്ളിച്ചു കൊണ്ടിരുന്നു  . പിഞ്ചു കുഞ്ഞുങ്ങൾ പോലും അതിന്റെ ഗർജനത്തോട് പൊരുത്തപ്പെട്ടു കഴിഞ്ഞിരുന്നു"

ഹരിഹരൻ ഒന്ന് നിർത്തി.

  ചായ ഗ്ലാസ് ചുണ്ടത്ത് വെച്ച് ചുറ്റും ഒന്ന് കണ്ണോടിച്ചു.
ശേഷം ഒരു സിഗററ്റ് കത്തിച്ചു. പുകചുരുളുകൾ ഗോപാലേട്ടന്റെ കടയുടെ ഓല മേഞ്ഞ മേൽക്കൂരക്കുള്ളിൽ അലിഞ്ഞില്ലാതായി.

എല്ലാവരും ഹരിഹരന്റെ മുഖത്തേക്കു തന്നെ നോക്കി കൊണ്ടിരിക്കുകയാണ്.

ഒരു സിഗററ്റ് വലിക്കാൻ ഹരിഹരൻ ഒരു വ്യാഴവെട്ടക്കാലം എടുത്തോ എന്ന്  തോന്നൽ പോലും പലർക്കുമുണ്ടായി.

മേശപ്പുറത്തു വെച്ച ഗ്ലാസിലേക് നോക്കി ഹരിഹരൻ സിഗററ്റ് കുറ്റി നിലത്തേക്കിട്ടു ചവിട്ടി കെടുത്തി .

ഹരിഹരന്റെ ചുണ്ടുകൾ വീണ്ടും ചലിക്കാൻ തുടങ്ങി.

"ചില ദിവസങ്ങളിൽ ശബ്ദത്തിന്റെ തീവ്രത അല്പം കൂടും. ചില ദിവസങ്ങളിൽ കുറയും.
ഇടവേളകളുടെ ദൈർഘ്യങ്ങൾ തമ്മിൽ പലപ്പോഴും വലിയ അന്തരമുണ്ടാവാറുണ്ട്.
ഗർജനത്തിന്റെ ഉറവിടം മനസ്സ്സിലായിരുന്നില്ല അപ്പോഴും.
ഒരു ഭാഗത്തേക്ക് ശ്രദ്ധിച്ചാൽ ആ ഭാഗത്ത് നിന്നാവും ശബ്ദം. മറ്റൊരു ഭാഗത്തേക്കാണ് ശ്രദ്ധിക്കുന്നതെങ്കിൽ ശബ്ദം അവിടുന്നാവും. നിശബ്ദത പോലും ചില സമയങ്ങളിൽ ഞങ്ങളെ ഭയപ്പെടുത്താറുണ്ടായിരുന്നു. "

"ഗോപാലാ.... ഒരു  ചായ കടുപ്പത്തിലിങ്ങോട്ട് പോരട്ടെ. "

നിശബ്ദതയെ ഭേദിച്ച് ബീരാൻക കടയിലേക്ക് കയറി വന്നു. ആരും തിരിഞ്ഞു നോക്കാതെ പല്ലിറുമ്മി.

"ന്താപ്പോ ഇബടെ എന്നുല്ലാത്ത ഒരു കൂട്ട ബർത്താനം. ആരേലും മജ്ജത്തായോ.."
ഹരിഹരന്റെ കേൾവിക്കാരെ നോക്കി ബീരാൻകയുടെ ചോദ്യം.

"ഇപ്പൊ ആരും മരിച്ചില്ല. ഒരുപാട് പേര് മരിച്ചാൻപോണ്..."
കണ്ണ് ഒരു പ്രത്യേക രൂപത്തിലാക്കി ബീരാൻക ക്കു നേരെ കഴുത്തു മാത്രം തിരിച്ചു അലവിക്കയുടെ മറുപടി..

ഇത് കേട്ട ബീരാൻക ഒരുനിമിഷം സ്തബ്ധനായി.

"മരിച്ചാൻ പോണെന്നോ.."
ബേജാറോടെ ബീരാൻക ചോദിച്ചു.

"അതെന്നേ... ഇജിബിടെ ഇരിക്ക് ബീരാനെ.. ഇബൻ ബാക്കി പറയട്ടെ."  കമ്മുക്കയുടെതാണു ശബ്ദം.

അപ്പോഴാണ് ബീരാൻക ആൾക്കൂട്ടത്തിന് നടുവിലിരിക്കുന്ന  ഹരിഹരനെ കാണുന്നത് .

"ആഹാ. ഇബനാരാ. ഇവിടടുത്തൊന്നും കണ്ടിട്ടില്ലല്ലോ. ന്താ കുട്ട്യേ അന്റെ പേര്.. ജ് എബടെള്ളതാ.."

അത് വരെ ആരും ഹരിഹരനോട്  അവന്റെ പേര് ചോദിച്ചില്ലായിരുന്നു.

"എന്റെ പേര് ഹരിഹരൻ. വീട് കുറച്ചകലെയാണ്.  അകലെ എന്ന് പറഞ്ഞാൽ ഒരു മാസത്തെ നടപ്പു ദൂരം കാണും.
വീട്ടിൽ അച്ഛനും അമ്മയും ഒരു സഹോദരിയുമുണ്ട്. "

ഹരിഹരൻ ഒരു ഇറക്ക് ചായ കുടിച്ചു  തുടർന്നു.

"പുറം ലോകവുമായി വലിയ ബന്ധമൊന്നുമില്ലാത്ത ഒരു നാടാണ് ഞങ്ങളുടേത് . അഞ്ചാറു ഭാഷകൾ സംസാരിക്കുന്നവരാണ് നാട്ടുകാർ. മലയാളം പൊതുവെ കുറച്ചു പേരെ ഉപയോഗിക്കാറുള്ളൂ. പുറം ലോകവുമായി നാടിനെ ബന്ധിപ്പിച്ചിരുന്ന ഒരേ ഒരു വസ്തു  ആഴ്ചയിൽ ഒരിക്കൽ വരുന്ന ചരക്ക് ലോറിയാണ്.ഒരാഴ്ച നാട്ടുകാർക്ക് മുഴുവൻ ജീവിക്കാനുള്ള ഏറെക്കുറെ സാധനങ്ങളൊക്കെ അതിൽ ഉണ്ടാവും. ഒരു മാസം മുമ്പുള്ള ചരക്ക് ലോറിയിൽ കയറിയാണ് ഞാനിങ്ങോട്ട് വന്നത്. അലഞ്ഞു തിരിഞ്ഞു ഇവിടെത്തിയപ്പോ ഇവരുടെ സ്നേഹം കണ്ട് എന്റെ കഥ ഇവരോടൊക്കെ   പറയാമെന്നു കരുതിയതാണ്"

ഹരിഹരൻ കൈയിന്റെ പുറം ഭാഗം കൊണ്ട് ചുണ്ടൊന്നു തുടച്ചു.

"ആ...ന്നാ പറ. ഞമ്മളും കൂടെ അന്റെ കഥ ഒന്ന് കേക്കട്ടെ...."

ബീരാൻക കമ്മുന്റെ അടുത്തിരുന്നു.

ബീരാൻക യുടെ മുന്നിൽ ചായ ഗ്ലാസ് വെച്ച് തോളത്തിട്ട മുണ്ടിൽ കൈ തോർത്തി ഗോപാലേട്ടനും അപ്പുറത്തിരുന്നു.

ഹരിഹരൻ തുടർന്നു.

"ഒരു ദിവസം രാവിലെ എണീറ്റ് മുറ്റത്തിറങ്ങിയ നാട്ടുകാർ കണ്ടത്  വൃദ്ധരെയും കുട്ടികളെയും സ്ത്രീകളെയും ഒരേ പോലെ ഭയപ്പെടുത്തുന്ന  കാഴ്ചയായിരുന്നു"

http://dilshadvkpullara.blogspot.in

(തുടരും)

http://dilshadvkpullara.blogspot.in/?m=1